Tā mātou tukanga tuku amuamu

Kei konei mātou ki te āwhina i a koe kia tere, kia tōkeke hoki te whakatau i tō amuamu.

Mēnā kei te rangirua koe ki te tuku amuamu, kei te pai – whakapā mai.

Me pēhea te whakapā mai

Me:

• whakakī i tā mātou puka tuku amuamu tuihono
• tukuna mai he īmēra, he reta rānei
• waea mai ki a mātou.

Ka whakarongo, ka āwhina hoki mātou i a koe ki te whakatau he aha ngā mahi hei whai māu.

Kei te hiahia āwhina motuhake?

Ka taea e mātou te tautoko i a koe mēnā kei te hiahia āwhina ki te whakawhiti kōrero ki a mātou, kia mārama hoki ki te tukanga. Tirohia: āwhina motuhake.

Ratonga whakatau wawe 

Kia whiwhi mātou i tō amuamu, ka pēnei:

Ka whiriwhirihia tō amuamu e tō pēke

Hei mahi tuatahi, ka tukuna tō amuamu ki tō pēke kia taea ai e ia te āta whakautu.

Me whai wā tō pēke ki te whakatau i tō amuamu.  Tirohia: te tuku amuamu ki tō pēke.

Ka whakapā atu tō pēke ki a koe ki te tuku i tana whakautu. 

Ka tuku tohutohu hei āwhina i a kōrua ko tō pēke

Ka taea e koe te whakapā mai ki a mātou ki te kōrero mō te whakautu a tō pēke me ō āwangawanga kāore anō kia puta.

Ka āwhina tā mātou ratonga whakatau wawe i a kōrua ko tō pēke ki te mahi tahi ki te whakatau i tō amuamu. Mēnā e taea ana, ka tuku tohutohu, tuku mōhiohio hoki pērā i:

• ngā aratohu poto e whakawhāriki ana i tō mātou tikanga ki te whakatau i ngā momo amuamu rerekē, me
• ngā tuhipoka take e whakarāpopoto ana i ngā putanga o ngā amuamu ōrite o mua.  

Mēnā kua tuku tono tō pēke ki te whakatau i tō amuamu, ka taea e koe te whakapā mai ki te whiwhi tohutohu. Mēnā ka whakaae koe ki tētahi tatūnga whakatau amuamu, e kore e taea e mātou te tirotiro tonu i tō amuamu.

Mēnā kāore koe i te pai

Mēnā kāore i pai ki a koe te whakautu whakamutunga a tō pēke – kua hipa rānei te rua marama, neke atu, i muri i tō tuku amuamu –  ka taea e koe te tono ki a mātou kia whakaarohia ōkawatia tō amuamu. Engari me whakapā mai ki a mātou i roto i te toru marama o tō whiwhi i te whakataunga whakamutunga a tō pēke.

Ratonga whakatau take

Ki te tae tō amuamu ki tēnei wāhanga, ka āta tirohia e mātou. Tirohia: te āhua o tā mātou whakaaroaro ki ngā take.

Te kohi mōhiohio

Mā tētahi o tā mātou rōpū tō amuamu e arotake me te tirotiro mēnā ka tirohia e mātou. Tirohia: ngā amuamu ka taea e mātou te tirotiro, kāore rānei.

Mēnā ka taea e mātou tō amuamu te tirotiro, ka kohikohi mātou i ngā mōhiohio mai i a koe me tō pēke.

Te āwhina ki te whakarite whakatau

Ka āwhina mātou i ngā taha e rua ki te whai i tētahi whakaaetanga — tērā pea mā te āwhina ki te whakarite tatūnga, mā te tuku whakaaro mō tētahi putanga tōkeke rānei.

Whakataunga

Ki te kore e puta he whakaaetanga, mā mātou e whakatau. Ka whai wāhi kōrua ko te pēke ki te tuku whakautu ki ō mātou whakaaro i mua i te tuku i tā mātou whakataunga whakamutunga.  Mēnā ka kite mātou nā te pēke te hē, ka tūtohi mātou me pēhea te whakatau i te amuamu. Tirohia: Te paremata me ētahi atu tikanga whakaora.

Kāore e taea te whakawākia anō i tā mātou whakatau whakamutunga.

Māu e whakatau ka aha ā muri ake

Ki te whakaae koe ki tā mātou whakatau, ka herea te pēke e taua whakataunga, ā, ka tatū te amuamu.

Ki te kore koe e whakaae ki tā mātou whakatau, e wātea ana koe ki te tirotiro i ētahi atu huarahi, pēnei i te kōti.